Գրանկարներ տեսահոլովակ

Հետ հայացք դեպի 2016 թվական

Տարին մոտենում է ավարտին և ահա եկել է այն գնահատելու, արժեվորելու, ճանապարհելու և գալիք տարվա անելիքները հստակեցնելու պահը:

Տարին բարդ էր ու միաժամանակ ձեռքբերումներով հարուստ: Հպարտ եմ, որ կարողացել եմ հասնել այն հիմնական նպատակներին, բայց այնուամենայնիվ շատ հարցերում եմ թերացել, սխալվել եմ, հաճախ եղել առավել քան սառը, ինչպես սառույցը, հաճախ հոգումս բորբոքել մի ողջ արև: Հուզմունքի, երջանկության, հուսահատության, վերելքի հույզերի ողջ գունապնակով է լցվել հոգիս յուրաքանչյուր օրվա ընթացքում, և այդ կերպ ստիպել գնահատել ամենը, անգամ բաժանումն ու ցավը, երջանկության ակնթարթներն ու տխրության պահերը: Հասկացել եմ՝ հաճախ մարդիկ այնպիսին չեն լինում, ինչպիսին նրանց պատկերացնում ենք: Այնպես որ մի վերագրեք նրանց հատկանիշներ, որոնք կուզեիք կամ կարծում եք, որ պետք է ունենային: Պարզապես գնահատեք այն, ինչն արդեն տեսել եք...
Հաճախ հպարտությունս թույլ չի տվել ներել, բայց սովորել եմ ներել ու բաց թողնել, հաճախ երջանկության հուշերը մի ակնթարթում դարձել են տխրության պահեր, կործանվել են հարազատ մարդկանց հետ կապող կամուրջները, բայց այս ամենն ավելի ուժեղ են դարձրել ինձ...

Անցել եմ շատ դժվարությունների միջով, հաճախ գերագնահատել ու շատ հարցերում թերագնահատել ինքս ինձ, կարեկցանքի փոխարեն՝ անտեսել, իրականն ու արժեքավորը՝ արժեզրկել, վանել լավը, եղել անհանդուրժող, ու այս ամենը գիտակցելով, ինքս ինձ հարցրել ու փնտրել պատճառներ: Եվ ի՞նչ եք կարծում, մեղավորներ գտնվե՞լ են: Այո՛, բայց միայն մեկը՝ ես... 

Իմ խնդիրները փորձելով ինքս լուծել՝ ավելի ամուր եմ կանգնել, ավելի վճռական ու պայքարի ոգով տոգորվել: Անցնելով ամենի միջով՝ հասել եմ այն գիտակցության, որ կյանքում ցավի ու տառապանքի դեմ կա մեկ միջոց՝ պայքար, պայքարել հանուն...

Պայքարել եմ հանուն լուսավորի, բարու, արդարության, թեպետ ավելի կարծրացած սրտով եմ նայել անարդարություններին, սակայն երբեք թույլ չեմ տվել դրանց տեղ գտնել իմ հոգում: 

Ժամանակն ամեն ինչ փոխում է. հաճախ հարազատ մարդկանց միմյանցից բաժանում, իսկ մտերիմներին դարձնում պարզապես ծանոթ... Փոխվում են անգամ մարդիկ. դառնում օտար, անտարբեր: Սակայն անցյալում հարազատ, իսկ ներկայում պարզապես ծանոթ մարդկանցից ես պահում եմ մի գեղեցիկ հուշ: Նրանց ես պատկերացնում եմ ժամանակից անկախ ու չփոփոխվող իմ հուշերում. որտեղ նրանք հարազատ են ու անգին և անկախ նրանից թե ինչպիսին են հիմա, նրանք իմ հուշերում կմնան հենց այդպիսին` հարազատ ու անգին...

 Միաժամանակ շնորհակալություն եմ հայտնում բոլոր նրանց, ովքեր իմ կողքին են եղել, աջակցել, թիկունք կանգնել և հիմա էլ իմ կողքին են, իսկ անցյալում են բոլոր նրանք, ովքեր չկան ներկայում և չեն լինի ապագայում:

Թողնելով ամենն անցյալում մաղթում եմ խաղաղության, ներդաշնակության, առողջության, բարեկեցության, նորանոր ձեռքբերումների, հաջողություններ և ամենակարևորը երջանկության, ցանկությունների, երազանքների իրականացման տարի... Շնորհավոր Ամանոր և Սուրբ Ծնունդ...

Հնարավորություն

Անգամ, երբ թվում է,
Թե այս պահին
Չկա և ոչ մի ելք,
Այնուամենայնիվ
Հենց հաջորդ վայրկյանին
Ծնվում է ընտրության
Հնարավորություն...
Կյանքի ամեն հաջորդ
Ակնթարթում  թաքնված է,
Հնարավորությունը
Ընտրության...
Ու միայն մեզ է
Տրված ընտրելու՝
Սիրե՞լ, թե՞ ատել,
Սիրվե՞լ, թե՞ հեռու վանվել,
Նվիրվել ամբողջությա՞մբ,
Թե՞ հեռանալ վերջին պահին,
Միասի՞ն լինել, թե՞ մեն-մենակ,
Ներել անգամ աններելին,
Թե՞ ամեն մանրուքից
Ատելության սերմանել հոգում,
Սավառնել երազի թևով,
Թե՞ սողալ ավազին,
Քայլել դեպի նպատակը,
Թե՞ մոռանալ այն,
Նայել դեպի ապագան,
Թե՞ մնալ անցյալում...
Կյանքի բազում ակնթարթներից
Յուրաքանչյուրում
Կա ընտրության
Հնարավորություն,
Եվ միայն մեզ է
Տրված ընտրելու՝
Հնարավորությո՞ւն, թե՞...

Գիտեմ

Գիտեմ՝ երբ նորեն տեսնեմ քեզ,

Սիրտս սիրուց ուժգին կզարկի,

Ու այնտեղ եղած մենության ցավը,

Իսպառ կվերանա կրկին....

Գիտեմ՝ երբ նորեն տեսնեմ քեզ,

Սիրո երազը կպարուրի ինձ,

Ու այրող կարոտից նորից,

Աչքերս արցունքով կլցվի...

Գիտեմ՝ կորցրած հուշերիս համար

Սրտումս զղջում կլինի.

Հուշեր, որ իրական էին այնժամ,

Երբ կողքիս էիր դու...

Գիտեմ՝ քեզ նորեն կգրկեմ

Ու քո ջերմության կարոտից,

Սրտումս ներում կլինի այդժամ

Ու մի նոր կրակ կվառվի...

Գիտեմ՝ մեր հանդիպումից հետո

Կրկին կգնաս հեռու՜-հեռու՝

Իմ սիրող սրտում թողնելով

Քեզնից անմոռաց նոր հուշ...

#ԱրմՄխեյան

Կիսահույս սպասում

Կիսաբառ շշնջյուն` Սիրում եմ քեզ...

Փոքր-ինչ ջերմություն կիսամութում, 

Ու սիրո անավարտ խոստովանություն 

Կիսալույս հանդիպման ժամանակ...

Ու բաժանում՝ կիսահույս սպասումով, 

Քեզ նորից տեսնելու մեծ կարոտով, 

Անավարտ խոսքս քեզ հասցնելու, 

Կիսասեր սերն ամբողջացնելու հույսով...

Ասելու՝ փոքր-ինչ ջերմությունը քիչ է, 

Կես-սերը դեռ ամբողջական չէ, 

Փոքր-ինչ փաղաքշանքը դեռ ամենը չէ` 

Մեր սերն ամբողջացնելու համար...

Ու քեզ տեսնելու կիսահույս սպասում, 

Դեռ կա կիսալույս հավատ, որ կարող ես 

Ամբողջացնել կիսասեր կյանքը մեր. 

Միայն կես քայլ, ու ես կանեմ ամբողջը... 

Կիսամութ ճամփին կիսահույս հավատով, 

Կիսացավ հոգով կանգնած եմ դեռ՝

Համբերատար սպասումով քո կիսաքայլին. 

Կիսահույս սպասում՝ անավարտ ուղու վրա...

ԱրմՄխեյան

Երբ քեզ տեսա

Միայն թե իմանաս՝ որքա՜ն կամեցա
Քեզ իմ կողքին տեսնել,
Այն խելահեղ հանդիպումից,
Երբ քեզ տեսա…
Երբ քեզ տեսա,
Կյանքն ասես սկսվեց նորից,
Փոխվեց աշխարհն իմ,
Ու դու դարձար իմ աշխարհը…

Միայն թե իմանաս՝ որքա՜ն ցանկացա
Փայփայել քեզ ինչպես հրաշքից
Մի մասնիկ իմ հոգում,
Երբ քեզ տեսա…
Երբ քեզ տեսա,
Աշխարհն իմ հրաշքով լցվեց,

Դու դարձար հոգուս մի կտոր,

Ու սիրտս սիրով պարուրվեց...

Միայն թե իմանաս՝ որքա՜ն երազեցի
Քեզ իմ սիրով պարուրել,
Սիրո թևերով աստղերին հասցնել,
Երբ քեզ տեսա…
Երբ քեզ տեսա,
Շուրջս վառվեց մի բորբ արև,
Ու գիշերն իմ լուսավորվեց
Քո սիրո լույսով միայն…

Միայն իմանաս՝ որքա՜ն երջանիկ եմ,
Դու իմ հրաշք՝ երազից եկած
Ու իրականություն դարձած,
Երբ կողքիս ես…
Երբ քեզ տեսա
Իմ կողքին ու աչքերիս նայելիս,
Ես հասկացա. պահպանել է պետք
Աշխարհն այն, որում դու կաս…

Շնորհակալ եմ, որ կողքիս ես

Այնպես կուզեի գաղտնի պահել,

Սերս գիշերվա մթով քողարկել,

Բայց աստղերի մեջ արև թաքցնել

Անկարող եմ ես…

Երջանկությունը քո սիրո թևով

Հոգուս է փարվել, ու, եթե իմանայիր,

Թե որքան եմ քեզ սիրում,

Որ կեսգիշերն անգամ

Ինձ համար կեսօր է թվում…

Աշունը՝ ծաղկած գարուն,

Ձմռան սառնությունը՝

Արևի շողի վերածվում,

Երբ ամեն անգամ նայում եմ

Աչքերիդ խորունկ ու քեզ

Իմ գիրկն առնում…

Սերս թաքցնել՝ անկարող եմ

Եվ չեմ էլ ուզում, քանզի հիմա

Բառերն եմ ակամա

Քո ականջին շշնջում՝

Սիրում եմ ու կարոտում,

Երբ մեկ վայրկյան է անգամ

Մեզ իրարից բաժանում…

Չգիտեմ անգամ ինչպես

Քո մեծ սիրո համար,

Շնորհակալ լինել…

Գիտեմ՝ բառերով չես ասի,

Բայց եթե անգամ փորձեմ,

Պիտի անվերջ կրկնեմ՝

Միակ ու անբիծ քո սիրուց

Կյանքիս ամեն ակնթարթը

Այնպես թանկ է դարձել,

Եվ այս մեծ ու անսահման 

Երջանկության համար

Շնորհակալ եմ, որ կողքիս ես,

Շնորհակալ եմ…