2013-03-12

Վերջ տվեք ցինցիզմին

Մինչ Հանրապետությունում հետընտրական լարվածությունը էլ ավելի է խորանում, իշխանության որոշ չինովնիկներ բաբուխանյանման անպատկառ դիմակներ հագնելով, շարունակում են ծաղրել իրենց իսկ ժողովրդին՝ փորձելով խեղդել քաղաքացիական ձայնը: Նման փորձ արեց ՀՀԿ խմբակցության անդամ Հայկ Բաբուխանյանը: ՍԻՄ նախագահը դատելով իր գործողություններից հաճախ է դավաճանում իր թիմակիցներին, բայց նման մասշտաբային դավաճանությունը կարծում եմ պետք է հատուկ տառերով գրել նրա կենսագրականում: Դեռ մեկ տարի առաջ այս գործչին պատկանող «Իրավունք» կայքը լցված էր վիրավորական ու ծաղրանքով լի նկարներով, որոնց թիրախը ՀՀԿ-ն էր: Անգամ ամենաթունդ ընդդիմադիրը նողկանք էր ապրում մտնելով այդ կայք: Բայց այսօր այս «քաղաքական գործիչը» ՀՀԿ խմբակցության անդամ է: Բնականաբար հարց է առաջանում՝ այդ ինչպե՞ս… Պատասխանը մեկն է: «Իշխանությունը» իր շուրջն է հավաքել քծնվողներին և ցինիզմի երդվյալ կրողներին: Ամեն դեպքում այս պատգամավորը կարծում եմ պետք է պատասխան տա իր ասածների համար: Ի դեպ ֆեյսբուք սոցիալական ցանցում բացվել է Պահանջում ենք Բաբուխանյանին զրկել մանդատից Էջը: Ֆեյսբուքյան օգտատերերը Բաբուխանյանից պահանջում են անհամապաղ ներողություն խնդրել կես միլիոն հայերից և հրաժարվել մանդատից:
Օրեր անց այս անլուրջ քաղաքական գործչին միացավ ՀՀԿ-ական պատգամավոր, երգչուհի Շուշան Պետրոսյանը: Մեկ այլ ՀՀԿ-ական օատգամավորուհի էլ կոչ արեց չգնալ հանրահավաքների ու մնալ տաք տներում: Այս ծեծված թեմային այլևս անդրադառնալ չեմ ուզում: Բայց չանդրադառնալ մեկ այլ ՀՀԿ-ականի ակնհայտ ցինցիզմին չեմ կարող: ՀՀԿ երիտթևի ղեկավար Կարեն Ավագյանի գրառումը՝
«Րաֆֆի Հովհաննիսյան-ԲՀԿ զարգացումները դեռ առջևում են։
Բանն այն է, որ Րաֆֆին, հաղթահարելով կես միլիոնանոց նշաձողը, քաղաքական դաշտում առաջինը լինելու հայտ է ցանկանում ներկայացնել ԲՀԿ-ին։ Իրականում Րաֆֆիի ստացած 539 հազար ձայներից մոտ 455 հազարը պատկանում է ԲՀԿ-ին, որ վերջինս ստացել էր ԱԺ ընտրություններում։
Մի ասող լինի՝ ախր, այ Րաֆֆի, քաղաքական նկրտումներդ պետք է 85000-ին համարժեք լինեն։»
Կարեն Ավագյան

Կոչ եմ անում ՀՀ քաղաքացի Կարեն Ավագյանին զերծ մնալ նման սադրիչ գրառումներից: Մեկ այլ գրառում նրա ֆեյսբուքյան էջից.
«Բարևարշավի 2 նոր տարբերակ
1-ին Ու՞ր ես կորցրել իմ բարևը, տուր ինձ այն քանի չի սառել :ՃՃ
2-րդ Ձեզ մոտ հնարավո՞ր է էլի բարև մնացած լինի :ՃՃ
Հ.Գ. մնացած տարբերակները գտնել մուլտֆիլմում...»
Կարեն Ավագյան

Ակնհայտորեն ծաղրանքով ու ցինցիզմով լցված այս բառերը հարիր չեն պատգամավորի:
Նմանատիպ մեկ այլ գրառում՝
«Րաֆֆի Հովհաննիսյանը սկսում է նմանվել կամակոր մի երեխայի, ում կապրիզները չափ ու սահման չեն ճանաչում։ Երեկ Սերժ Սարգսյան-Րաֆֆի Հովհաննիսյան հանդիպման ժամանակ երկրորդ տեղը զբաղեցրած թեկնածուն հանրապետության նախագահից պահանջել է ամբողջական համամասնական ընտրակագի ընդունում, ԱԺ լուծարում և նոր խորհրդարական ընտրությունների անցկացում, պահանջներ, որոնք հակասահմանադրական են, և բնականաբար, դրանց ընդունումը դուրս է որևէ տրամաբանությունից։ Կարծում ենք, Րաֆֆին պետք է որ բավարար գիտելիքներ ունենա՝ հասկանալու համար իր առաջարկների հակասահմանադրականությունը և իզուր ամբոխահաճությամբ չզբաղվի։»
Կարեն Ավագյան

Իր գործընկերոջն ու թիմակցից փորձում է ետ չմնալ ԿԳ նախարար Արմեն Աշոտյանը: Ժամեր առաջ լրատվական կայքերում տեղեկություն տարածվեց, թե որոշ ակտիվիստներ փորձում են լռեցնել Աշոտյանին՝ նրա ֆեյսբուքյան էջի դեմ բողոքելով: Այս լուրը հաստատեց անձամբ Արմեն Աշոտյանը:
Ուղղակի չկարողացա զսպել ծիծաղս: Այսօր ֆեյսբուք սոցիալական ցանցում կարելի է հարյուրավոր կեղծ օգտատերերի էջեր հայտնաբերել, որոնք րոպե առ րոպե համացանցը լցնում են Րաֆֆի Հովհաննիսյանի ծաղրանկարներով և կեղծ ինֆորմացիայով, ու դեռ մի բան էլ Արմեն Աշոտյանն է նեղրստում:
Մեկ այլ գրառում Արմեն Աշոտյանի ֆեյսբուքյան էջից.
«Ինձ թվում է, ևս մեկ-երկու նմանատիպ հանրահավաք, և ես որպես դեռևս գործող ԿԳ նախարար կարող եմ ԺԱՌԱՆԳՈՒԹՅԱՆՆ ՈՒ ՐԱՖՖՈՒՆ բացակա դնել :)
Տեսնես, այս կրեդիտային համակարգի պայմաններում ո ՞նց եք լրացնելու :)
Հ.Գ. Բժշկի թուղթը չի անցնելու, ասեմ նախապես... :)»
Արմեն Աշոտյան

Այս պաշտոնյաները չբավարարվելով իրենց թիմակից ընկերների ցինիզմով՝ շարունակում են հեգնել իրենց քաղաքացիներին: Ցավալի է, բայց փաստ:
Ցինիզմը ցանկացած քաղաքական գործչի բնորոշ հատկանիշը կարող է դառնալ մեկ ակնթարթում: Հարցս ուղղում եմ վերը նշված բոլոր պաշտոնյաներին. Դուք որևէ քայլ անու՞մ եք ցինցիզմի ճիրաններից դուրս պրծնելու համար…




Комментариев нет: